Re·baenggipa Lok Sabha election na skang TMC dolrang BJP baksa donnue meligrikanirang dongenga ine Leader of Opposition aro Congress dolni dilgipa Ronnie V Lyngdoh aganangaha. Ia kattarangko ua batanggimin salrango Mukul Sangmani dingtangmancha Congress dolrang baksa bakrime kam ka·na kraagita somoina senggenchimoba LS election o susanagiparangni bimingrangko mingsoaha ine matnangani ja·mano aganangskaaha.
Sangmani matnange aganani bidingo aganchakengon, TMC dol West Bengal-o apsan seat rangko sualna meligrikjani gimin a∙doko Congress dol bakrimjaha ine Lyngdoh parakataha. TMC dol Congress baksa West Bengal o bakrima ong∙ode a∙dokoba bakrimgenchim ineba Lyngdoh agandapangaha.
Meghalaya o ge·gni seat rangsan gnang aro West Bengal ko niatgenchimode ge 42 seat rang dongskaa jeon TMC dolni Congress dol baksa bakrimna sikgijanian mongsonggipa neng·nikani ong∙enga ine Lyngdoh aganangaha. Iani kosako TMC dol West Bengal-o Bharatya Janata Party (BJP) baksa LS election na seatrangko sualanio donnue bakrime kam ka·enga ineba Lyngdoh janapangaha.
