SGH a·jani Nokatgre songo ro·ongko bikotna a·bachengna am·enganiko dontongatchina daito donggipa dilgiparangko niroke nanggipa ja·kurangko de·china Karukol Unit ni GSU dolrang a·jani DC na chitti see mol·molataha. Ua biapo ro·ongko bikotanichi jolo donggipa bol wa·arang, bari baganrangko nisiatan baksana nitobegipa Renang dare jekon wilwilaoni aro gipin a·songrangoni manderang nina re·baronggipa biapko nosto ka·ani ong·gen ine janapataha.
Batanggimin March 9 tariko Karukol GSU member rang Nokatgre songona re·ange biapko nieon ro·ongko bikotgenchimode bang·a nisiataniko ra·baani ong·gen ine ma·sinagita man·angaha. GSU dolrang aro songni manderangni beng·aniko manigija ro·ongko bikotna am·enggipa mandeara Mindikgre songoni an·tangko saksa Social Activist ine agangipa Greneth M. Sangma ong·a ine janapataha. Unbaksana Nokatgre songni Nokma ro·ongko bikotchina gita hukum (NOC) ko Greneth Sangmana on·e antangni a·kingni adita a·arangko sale on·mangenchimoba, dingtang biaponasa apjite ro·ongko bikotna am·enganiko ma·sinagita man·angskaaha jean songni nok 5 manderangni gue baganko man·chapaha ine u·iatangaha.
Ia Renang dare ko ripinge rakkinagita Mines & Minerals (Development & Regulation) Act, 1957 aro Mineral Concession Rules 1960 niamo pangchake Reconnaissance Permit/ Prospecting Lease/ Mining Lease ko on·chinagita bil gnanggipa dilgiparangko GSU dolrang mol·molangaha.
Ro·ongko bikotanio jegalani ba namnikgijanirangara-
1. Bil man·gipa dilgiparang ro·ong bikotaniko dontongatjagenchimode matburingrangni dongramko nisiatani ong·a.
2. Bil man·gipa dilgiparang iako dontongatna neng·nikgenchimode a·arang ruronganiona sokgen aro a·arangko gapataina namen neng·nikani ong·gen.
3. Ro·ong bikotaniko nie dongaiode buring bolgrimko nisiatasan ong·aijawa indiba Tourism ni a·baoba dal·a gimaani ong·gen.
4. Ia kamko dontongatjagenchimode manderangni nina ba rona re·ronggipa biap jekai Renang dare, Jadisil Fish Sanctuary, Aginma Wari, Nakama Cave, Tetengkol, Wari Chora aro gipin nitogipa biaparangni chirang chonanggen aro ramarang nosto ong·anggen.
5. Kosako janapgiminrangko nisiatjanagita aro darerangko gimaatjanagita ro·ong bikotaniko dontongna nangchomota.
Indake mikkangchi Renang dare ba gipin darerangko gimaataoniko naljokata ripinge rakkiangna man·agita SGH a·jani DC ko nirokatpachina Karukol GSU dolrang mol·molan baksa didiangaha.
