Tura constituency ni MP Agatha Sangma, 10M Indoor Shooting Range ko Don Bosco Higher Secondary School Turao a·bachengatna da·al salo oprake on·angaha. A·doko kal·susaanirangko tang·doatna Chief Minister Conrad Sangma-ni gamchate ra·e dilanichi ia slai gosusaani a·bao dingtanganiko ra·baaha jeon re·anggipa salrango 2024 Meghalaya Games ko skanggipa changna Garo Hills o sokachakanio nikangaha ine Sangma aganangaha. Indakgipa susaanirangko ong·atanichi Garo Hills ni chadamberangna dingtang dingtang susaanirango bakko ra·na cholko on·angaha aro Don Bosco gita dakgipa skulrang donganichi aro sports departmentrangni tikkele jotton ka·anichi dal·begipa programko chu·sokatna man·angaha ine Sangma agandapangaha.
Shooting Association ko a·bachenga somoirango chalaina neng·nikanirangko man·genchimoba da·o ia 10M indoor shooting range ko a·bachengatna man·anina West Garo Hills Shooting Association-ni President Proley M. Sangma katchaaniko parakangaha. Sorkarioniko da·o dipet uamang gong lakh 1 kosan man·kuenga jekon kal·chakgipa a·damko namdapate tarina korosrang ka·aha ine President aganangaha. Uamang dal·bate dakna miksonganirang donggenchimoba dakchakani gride man·ja aro korosrangnigita bilgriani ong·a ine ua agandapangaha. Ia kal·susaani a·damko tarina uamangna biapko on·aninaba Don Bosco Higher Sec. School ni Principal Fr. Threnius N. Sangmakoba mittelangaha.
Ia indoor shooting range-o da·o dipetde ge·sa rifle aro pistol ge·gnisan dongkuenga jekon mikkang changrango bang·bate ra·dapna miksonganirang gnang ine association ni President aganangaha. Indake ong·genchimoba je donggipa rifle aro pistol mangmangchi gisiko nanggipa chatro chatrirangna mikkangchi slai gosusaani a·bao bakko ra·nagita tarisamsona dakchakanggen ine Association ni President agandapangaha.
