Meghalaya a∙dokni Department of Arts and Culture-nigita jatni daka rikani bidingo nambate am∙sandiako dakna, Chief Minister’s Research Grant (CMRG) ko a∙bachengate on∙angaha. Ia CMRG ko a∙bachengatani miksonganiara, a∙dokko rikna nanggnigipa a∙bao jekai Arts & Culture-nigita Meghalaya a∙dokni jatgittamni daka rikani, a∙a chia, ku∙sik aro ma∙chongrangni bidingo nambate u∙i ma∙sina am∙sandie uko lekka ki·taprango see rakkie donagita ong∙a.
Ia am∙sandianirangko dake a∙doko chagrongenggipa neng∙nikanirangni bidingo nanggipa ja∙kurangko de∙e, nambatate Meghalaya ni gunrangko India a∙songosan gipataigija gipin a∙songrangonaba gipatna kamrangko ka∙angna miksongangenga.
Ia CMRG o dorgastoko gale seokako man∙agita aro dakna nanggni kamrangko sorkari u∙iatangaha jean
1. Jemangan ia research o ba am∙sandianio bakko ra·na gisik nanggiparang komibeoba Bachelor’s degree ona poraigiparang ong∙na nanggen jean State University ba Central University ni on∙gimin UGC niamrango pangchakna nanggen.
2. UGC Act ni 2(F) aro 12(B) niamni ning∙o register ka∙gimin institutes, organisations aro apsan daken registered ong∙gipa society rang dorgastoko galna man∙gen, indiba research project na dilna seokgipa Project Director ko janapna nangskagen.
3. Ia project na galna sikgiparang Government of Meghalaya portal, Department of Arts & Culture ni website o nape galnagita man∙gen.
4. Dorgastoko galaniko English ku∙sikchi mangmangsan online gita gapatna man∙gen.
5. Saksa dorgastoko galgipa ge∙sa research proposal na bate sena manjawa.
CMRG ni Committee memberrang dorgastoko galgiparangko seokanggen aro seoka man∙giparang Shillong ona personal interview na okamako man∙gen. Shillongni a∙palo donggiparangna a∙dok sorkarinigita maming dake T.A/D.A on∙aniko dakjawa. Ia project ko ja chikkungo matchotatchina somoiko tik ka·e donaha aro tangka gong lakh gittamko sorkarinigita chamatenga jekon bak dake changgittam gamaniko dakangna tik ka∙angaha. On∙gimin somoio ia project ko matchotatna man∙jagenchimode chu∙gimik tangka chamatgiminko gampilnagita nanggen ineba u∙iataniko on∙angaha.
