Chinirangko niam gri India a·songoniko Bangladesh a·songona badingsrukenganirang batroroenganina aro Bangladesh a·songoniko gue granrangko ra·baenganina bakrimgimin NGO dolrang jekai ACHIK, FKJGP, GSMC, AYWO, Nongalbibra ni AOSW dolrang namnikgijaniko janapate SGH a·jani DC na chitti see u·iatangaha. Bangladesh a·songona niam gri badingsruknagita miksonge bostani bosta chinirangko Garo Hills ni a·jaranggita ra·baenganiko bang·en niknagita man·enga. Iarangko maming u·iatani aro hukum gri salenga jean a·dokni dongimin niam retiko pe·ani ong·a ine NGO dolrang chittio janapataha.
Chini aro gipin bosturangko badingsrukna ra·baenganiara chu·gimik niamni a·palo ong·an baksana iarangko ta·raken nirokate dongtongatchinagita uamang didiangaha. Ia niamgri dakaniara daitoo ga·ake nirokenggiparangni ong·gija dake an·tangtangni man·gnina kam ka·ani ong·a ine NGO dolrang raken jegalaniko dakangaha.
Unbaksana Bangladesh a·songoniko niam gri gue granrangko India a·songona Baghamara-Rongara-Damra ramaranggita salbaenganikoba salantion niknagita man·enga ine uamang janapataha. Indakgipa niamni apalo kam ka·aniara sorkarini kajina man·gniko gimaatan baksana a·dokni game ge·e bading chiwale cha·giparangna aro Garo Hills-o gue baganko dake cha·giparangna komia damrango palna nangaona sokatenga ine NGO dolrang u·iatangaha.
Indake niamni a·palo badingsruke dakenganiko a·doko game ge·e cha·giparangni namgnina daito donggiparang niroke kamko ka·chinagita mol·molangan baksana niamgri badingsrukenggipa manderangni kosako kraa sastiko on·chinaba NGO dolrang didiataha.
