March 18 oni 23 tarikona Dimapur, Nagaland o ong·nasienggipa North East Olympic Games 2024 o Meghalayani basketball dolo kal·na Garo Hills ni sak 4 chadamberang seokako man·aha.
NE Olympic Games o a·dokni palo kal·na seokako man·gipa me·asarangoni North Garo Hills a·jani Ashabirth Marak, Cheksrang Marak aro Bornsnar Sangma ong·a. Apsan dake me·chikrangoni West Garo Hills a·jani Caneya Sangma a·dokni palo me·chikrangni dolo kal·na rimnapako man·angskaaha.
NE Olympic Games 2024 na a·dokni palo kal·nagita uamangko batanggimin salrango Tura o ong·atanggipa 5 gipa Meghalaya Games o nambate kal·mesokanirangko nigrike seokangaha. Uandake da·o uamang gipin seokako man·giparang baksa a·dokni skotong songjinma Shillong o nambate kal·mesoknagita skie ra·aniko dakangenga.
