Adita koborrangko man·soe, Damalgre Pulis thana ni ning·o ong·gipa Balalgre songo pekatgipa samko badinggipa sak 4 manderangko Ampatini Dy SP Ravi K. Sangmani dilanichi Tura aro Ampati ni Anti-Narcotics Task Force (ANTF) dolrang bakrime rim·nagita man·angaha. Uamangoniko SPSHEN+ ge 150 capsule rang baksana mobile phone ge·gittam aro Auto bolsako man∙aha ine pulis dolrang u∙iatangaha. Rim·ako man·gipa sak 4 manderangara, Tura Baladingni Chanchu M. Marak, Singimari Hallidayganj ni Topon Das, Tura Hawakhana ni Santo Bhowmick aro Raj Barman ong·a.
Ia sakbri rim·ako man·giparangara beng·gimin pekatgipa samrangko Mankachar, Assam oniko Garo Hills o palnagita ra·baenggiparang ong·a ine pulisrang u·iatangaha. Unbaksana battanggimin somoirangoba rim·ako man·gipa manderang indakgipa kamrangni a·selon rim·a man·ahaoba, ranta ong·e dosiko daktaitaienggiparang ong·a ineba janapangaha.
Una agreba indake pekatgipa samrangko badinggipa manderangko pulis dolrangna sriksrik u·iatgenchim ong·ode boksisko on·gen aro kobor on·gipako darangnaba u·iatjawa ineba SWGH ni SP u·iatangaha.
