West Garo Hills a·jani ning·o niamgri itta tarie so·giparang batroroenganiko nike, niamni a·palo chalaianiko dontongatnagita block ni gadango nirokgipa dolrangko donchina Turani District Magistrate u·iataha. Ia dolrangna dingtangmancha block ni ning·o niam gri itta so·aniko am·sandie nirokna aro rim·a man·ode sing·sandie niamgita dakna nanganirangko ja·rike dontongatani, ka·mikenatani aro dai ra·ani daitorangko pakwatangaha.
Block tangtangko niroke uamangni pilak kam ka·anirangko rongtale see rakkie District Magistrate ona sal 15 prako sokatchinaba ia dolrangko u·iatangaha. Niam gri itta so·anichi mandeni be·en bimangna, bola wa·ana aro janggitanggiparangna namgijaniko ra·baani bidingo manderangna mikrakataniko on·china pilak Nokmarang, songni manderang, VEC Secretary/President aro NGO rang baksa melie kam ka·chinaba uamangko ge·etangaha.
Songni manderangko ia kamrango bakrime kamrangko ka·china didichinaba uamangko u·iatangaha. Iasan ong·aigija somoigita uamangni kamrangko nipilchina, namdapatna nangenggipa biaprangko ma·sie ra·e nanggipa ja·kurangko de·e dolko bilakdapatna kam ka·chinaba aganangaha.
