Rubber ge∙e cha∙giparangni neng∙nikaniko olgrokatnagita aro koros bon·anirangko komiatnagita nambatgipa aro altugipa janggi tangani cholko ra∙baaniko Mendipathar Multipurpose Co-operative Society (MMCS) ni Secretary Sister Rose Kayathinkara parakataha. Game cha∙giparang ka∙rongbewalgita dingtang dingtang hajira kamrangko ka∙atna nanggija da·ode rubber sekirangko MMCS na joljol palna man∙gen ine Sr. Rose u·iatangaha.
Rubber ge∙giparangna Co-operative nigita 200 ltr ni drumrangko on∙an baksana Passbook-koba sakpraknan suale, salantio rubber sekiko drumrango chimonge name wingwinge dona nanganikoba agantalate on·angaha. Uamangni ge∙etgimingita pringo seng·gnangkalaoni rubberko ratna a∙bachenggenchimode kamrangko batbegipa pringni 9 bajirangon matchotatna man∙gen jean 70% nigita somoi aro tangkakoba komiatna dakchakanggen ineba u∙iatangaha. Manderangni chimonge ra·bagimin rubber sekirangko name tarinagita, Chidimit Nengsat jolo CENEX FACTORY ko kulianikoba janapangaha.
Ia kamrangna da∙o indin register ka∙aniko a∙bachengataha aro jemangan bak ong∙na sikgiparangoni register ka∙kujagenchimode register ka∙china u∙iatangan baksana name talbate ma∙sinagita uamangni office number 8787390124-ona call ka∙ate sing∙sandichinaba koborko parakataha.
