A·dokni pilak skulrangon electoral club rangko ra·gate democracy maikai ong·aniko chatro chatrirangna skie on·agita Meghalaya Chief Electoral Officer, Education Department baksa Shillong songjinmao MoU ko soi ka·angaha. Ia ja·kuko de·e a·bachengatna miksonganiara democracy ni bidingo chadamberang nambate aro ning·tubate u·ie ra·na man·agita syllabus-o napate skie on·a miksongani ong·a ine Education Department ni Director Swapnil Tembe aganangaha. Unbaksana pilak chadamberangan bilsi 18 gapjokon voter ID rangko ta∙rake tarichina didiangaha maina bang·bata bilsi 18 ba 19 ong·gipa chadamberang pu∙onaniko gamchate ra∙jaenga ine aganangaha. Indake skulrango democracy ba dilgiparangko an∙tangtangni pu∙onachi seokna gamchataniko skie on·anichi bang·a namdapataniko aro dingtangataniko ra·bana man·gen ineba Tembe aganangaha.
Kobor ra·timgiparangna aganangengon, re·baenggipa Lok Sabha election-o Election Commission of India, chadamberangko bang·bate bakko ra·atna man·agita aro uamangna mikrakataniko on·a Education department baksa bakrime skul aro collegerango electoral literacy club ko a·bachengatna tik ka·angaha ine Chief Electoral Officer B.D.R. Tiwari aganangaha. Ia electoral literacy club ko a·bachengatna tik ka·aniara gitchamgipa chanchiani ong·genchimoba iako ra∙gatanio name mancha mangrake kam ka∙anirang dongjaenganina kamrangko nambate ka·angtaina ja·ku de·anggen ineba Tiwari agandapangaha. A·doko democracy ko poraiani a·bao napatna ja·ku de·aniara Election Department aro Education Departmentni mikkangchi maikai manderangna democracy ni niamrang aro jakkalanirangko talbate u·i ma·sibatatna man·an baksana a·doko manderangni pu·onanirangko bang·batatna kamko ka·ani ong·anggen.
