SWGH Ampati songjinmani Students’ Field o 8 gipa District Level Industrial Exhibition ko SWGH ni General Manager Office, District Commerce & Industries Centre aro Meghalayan Age Ltd., Meghalaya Tourism, Meghalaya Grassroots Music Project aro Nokpante Production baksa bakrime mijaloni ong·atangenga. Ia salgittam na ong·angenggipa exhibition ko Mahendraganj contituency ni MLA Sanjay Sangma mongsonggipa sokgipa ong·e oprake on·angaha.
Ia salgittam na ong·enggipa exhibition ko Nokpante Production Meghalaya Grassroots Music Project ni bakgita dingtang dingtang niani jekai mini fitness centre, mingsinggipa golporangko nie aro knae ra·ani, cha·anirangko palgipa dokanrang, jachipchang ra·chakani biap aro MGMP ni doke dame mesoknagita miksonge ong·atangenga. Ia programona Betasing C&RD Block ni BDO CRN Sangma, SWGH SP Vikas Kumar aro dingtang dingtang department ni Officer rangba dongpae bakko ra·angaha.
Oprakani program o MLA Sanjay Sangma an·tangtangni changa sapaniko jakkalani gamchataniko, CM ELEVATE Scheme rangko man·ani aro chasong gitalni kolrangko jakkale kamrangko nambate ka·nagita agan ku·pattie on·angaha. Unbaksana kamrangko nengraatnagita kolrangko jakkalaniko, an·tangtangni changa sapaniko watgalgija jotton ka·angkuchina ka·dongatan baksana sorkarini dakchakani bidingrangoba aganangaha.
Ia programo bosturangko package ka·na aro pala sim·aniko bariatnagita jolni bading chiwalgiparangko didiangan baksana Dhubri-Phulbari dolongko matchotani ja·mano bading chiwale cha·giparangna namgipa cholko man·anggenok ine SWGH ni SP Vikash Kumar aganangaha. DCIC ni minggipin kamara manderangna kam nakatatani, bading chiwalanio dakchakani aro PMEGP nigita tangka paisarangko dakchakanian ong·a. DCIC office ko 2014 oni a·bachengbaaha jean chonchongipa karkanarangko, an·tangtangna cholrangko dake cha·enggipa aro jolni chu·gimik tang·doanina miksonge kamko ka·enggipa ong·a.
Unbaksana DCIC ni ning·o adita program aro scheme rangko on·aniara Master Craftsmen Scheme, a·doko aro a·palchi training ko on·ani aro Investment Promotion Programme jeon janggi tanganio an·tangtangni changa sapaniko jakkalna nanggipa skianiko aro dakchakaniko on·enga. Indake dingtang dingtang dakchakanirangko on·anichi, a·doko changgipa sapgipa manderangni kam donggija dongenganiko dake cha·na dakchakanian DCIC ni rakbee jotton ka·aniko mesoka ine an·ching u·inagita man·a.
