South Garo Hills ni Sima ari jolrango bang·bate anti damrangko tarie on·china aro Baghmarani sima ari jolo Bangladesh baksa bading chiwalgrikaniko namdapatnagita Land Custom Sation (LCS) ko name chalaie on∙china saksa Social Activist Greneth M. Sangma Chief Minister Conrad Sangmana chittiko see mol·molataha. Chittio janapanigitade battanggimin bilsirango iani bidingo Director of Commerce & Industries Departmentko sorkari baksa iani bidingo nirokatchina mol·molaniko dakangmanahaoba departmentnigita mamingba ja·ku de·e kam ka·aniko niknagita man∙kujaenganikoba janapangaha.
Da·ororo Bangladesh sima ari jolo BSF dolrang donggenchimoba niamgri guerangko badingani aro niamgri napdrae dingtang dingtang bosturangko badingsrukanirangkoba niknagita man·kuenga. Guerangkosan ong·aigija jilla kaani, bolrang, koela aro chinirangko badingsrukanirangkoba niknagita man∙enga ineba janapataha.
Ia niamgri badingsrukanirangko ta·rake nirokate dontongatchina South Garo Hills-o songdongenggipa manderangni palo Social Activist Greneth M. Sangma Chief Minister-o mol·molaniko dakangaha.
