Re∙baenggipa Lok Sabha election-o Tura Parliamentary seat na Independent ba jakgittel ong∙e susaangnagita gitcham MCS Laben Ch. Marak Ku∙rongdikna parakataha. Marak re∙anggipa bilsio ACHIK dolko dile Winter Capital aro Job Reservation policy na okgimu chake jingjengate dabianiko dakangaha. Ru∙utgija somoini gisepon ua A·chik Conscious Holistically Integrated Krima (ACHIK) dolko wate, gitalgipa A·chik State Peoples’ Front (ASPF) dolko bikotaie kamrangko ka∙angna a∙bachengataha.
LS election o susana miksonganiko sing∙on, ua Winter Capital aro Job Reservation Policy ni bidingo NGO ong∙e dabina bilonggen neng∙nikani ong·a ine janape, politics ni a∙bao chu∙sokgenchim ong∙ode uamang rakbate dakgrikna bilakgipa ja∙kurangko de∙na kamrangko ka∙angna man∙gen ine Marak aganangaha. Uandake re∙baenggipa election o Marak, darang party ko basegija aro nitegija jatni dabianirangko an∙tangtangni gisiko done apsan ku∙mong nangrime kamrangko ka∙angnagita manderangko didiangaha.
