Batanggimin bilsirango Garo Hills ni kenbegnigipa bobil dakgipa dol Garo National Liberation Army (GNLA) changsatai uamangni dolko bimang ong·ataina miksongenganiko parakate manderangna social media o jangataniko sakantian nikangnagita man·aha. Indake uamangni tom·na miksongani koborrangko man·e North Garo Hills pulis dolrang am·sandianirangko dake GNLA baksa jako donggipa manderang sakgittamko rim·nagita man·aha ine NGH ni SP Bruno A. Sangma parakataha.
Ia rim·a man·gipa manderangara Singsan K Sangma, Tilja Sangma aro Surya Sangma ong·a ine ma·sinagita man·aha aro uamangoniko mobile phonerangko mangmangsan man·e silchidareko man·jaha ine u·inagita man·angaha. Rim·ako man·gipa manderangna agreba ia dolko a·bachengtaina miksonganio sak 8 bako donggiparang dongkuenga ineba SP Sangma aganangaha.
Singsan Sangma United A·chik Liberation Army (UALA) ni saksa gitcham member ong·a aro ua dingtang dingtang dosi dakanirango Assam a·dokoba jako donggipa ong·a ineba SP Sangma aganangaha.
Uamangni dolko a·bachengtaina am·aniko lekkao parakatanio Chairman ong·e jako ra·e kam ka·na Goera Pantora Sangma minggipa mande soi ka·aha ine niknagita man·angaha. Uamangni February ni 7 tariko parakatani ja·mano tangka dabie ra·ani bidingo Kharkutta PS o February 24 tariko mokordoma ka·anikoba nikna man·aha ine SP Sangma u·iatangaha. Iani bidingo Pulis dolrang nambate am·sandianiko dakangkuenga ineba SP agandapangaha.
