Bangladesh a·songoniko Garo Hills a·jarangona niam gri gue granrangko badinganiko A·chik Conscious Holistically Integrated Krima (ACHIK) dolrang raken jegalaniko dakataha. Gue granrangko niamni a·palo badinganichi songsalko dilenggiparangna, songdongenggipa manderangni be·en bimangna aro kajina man·anio namgijagipa a·selrangko ra·baenga ine ACHIK dolrang parakataha.
Sima ari nalsachini gue granrangko badingsrukani da·onaba ong·angkuenga jeon simsaka komiani a·sel ia kamko ka·gipa manderang sima arini guare cholgugarangko napna jakkalenga. Nirokgipa dolrangni simsakna jotton ka·genchimoba ia kamrangko sima ari jolo nikna man·engkua jeon jolni tom·tomanina aro naljokanina namen neng·nikaniko on·enga ine ACHIK dolrang u·iatangaha.
Ia namgijagipa bosturangko bringimin gue granrangko manderang chagenchimode uamangna bang·a gueoni man·gipa sabisirangko ra·bana man·a. Iasan ong·aigija jolni manderangni tang·doaniko aro uamangni badinganiko champengatasan ong·gija kajina man·ani aro pale sim·e cha·ani cholrangkoba ra·onani ong·a ine ACHIK dolrang parakangaha. Ia kamrang niamni kosako dosi dakani aro tangkarangko badingsrukaniba ong·a jeon mikkangchi niam gri badinganiko ka·angkuna chol on·an baksana tom·tomaniko ru·siani ong·a ine uamang aganangaha.
Ia gue granrangko sima ari jolo niamni a·palo badingsrukani ja·dilrangko sandichina ACHIK dolrang District Administration-ko didiangan baksa sima ari jolo rake nirokchina, rakgipa niamrangko tarichina aro ku·monge kamko ka·china mol·molangaha. Sima ari jolo donggipa songni manderangkoba an·tangtangna niroke dongchina aro indakgipa kamrangko nikgenchimode ta·rake kobor on·pachinaba ACHIK dolrang didiangjolaha.
