7 gipa North East Youth Festival-o Meghalaya Contingent dolrang chu·soke chegipa ong·e a·doktangna rasongko ra·baaha. Meghalaya Contingent dolara Directorate of Sports and Youth Affairs-ni Youth Co-ordinator Bobby Wahlang ni dilenggipa ong·a.
Ia manianiko February 26 oni 29 tarikona Tripura-ni skotong Agartala-o ong·atangaha. Ia manianio dingtang dingtang biaprangni daka rikani bewalrangko ma·sie ra·grikna cholko man·an baksana Northeast a·dokrangni chadamberangni susagrikanikoba nikangnagita man·angaha.
Meghalaya dolni sak 76 chadamberang dam 11 a·jarangoni ia manianio an·tangtangni changa sapaniko mesokangaha. Rock band-ni gadango uamang doka damanio nambatgipa ong·e chegipa ong·an baksana Rock band gadango chu·sokgipa ong·e skanggipa gadangko chasong gitchamni chrokanio, chasong gitchamni gitko ring·anio, dakmesokanio, rong nonganio, jajipchangchi noksa ra·anio aro saksan guitar kal·anio cheangaha. Uamangni chu·sokanian Meghalaya a·doko chadamberangni dingtang dingtang changa sapani aro gisiko nanganiko mesoke didiani ong·a.
Ia manianio bak ra·giparangara re·anggipa 2023 bilsio October 17 oni 20 tarikona Nehu Campus o ong·atgipa Meghalya Youth Exchange Program 2023-o chegiparang ong·a. Uamangni chu·sokanian Meghalaya a·dokna mikkim rasongko ra·baan baksana Meghalaya-ni chadamberangna didianikoba on·ani ong·a. Ia manianio Tripura-ni Chief Minister Dr. Manik Saha aro Sports and Youth Affairs Department-ni Minister Tinku Roy baksana gipinrangba dongpae bakko ra·angaha.
