HNLC rangni whatsapp gita tangka dabianiko aro GNLA rangni nangrimtaina chanchienganiko kobor man∙e name dake am∙sandianirangko dakna a∙bachengataha ine a∙dokni DGP LR Bishnoi parakata.
HNLC rangni bang∙a nokdangrangna whatsapp gita message rangko wate tangka dabianirangko knae pulis dolrang iarangni bidingo name dake am∙sandianiko dakna cyber wing nigita kamrangko ka∙enga ine DGP aganangaha. Indake ong∙engon ia dabianirangko man∙sogenchim ong∙ode bakkan pulis dolna u∙iataniko dakchina gitaba didianiko on∙angaha.
Iani gisepon kobor ra∙timgiparangni parakatani gitade mittam manderang ia dabianiko man∙soe tangkarangko gamataniko dakangaha aro gipinrang Bangladesh ni number oni ka∙atako man∙e maming ja∙ku de∙naba chanchisokgija dongna nangao ga∙akenga ineba DGP aganangaha.
GNLA ni nangrimtaina gita chanchiani koborko man∙e iani bidingo nambate talna gita pulis dolnigita Law and order ni IG ko Garo Hills o dongkamate am∙sandianirangko dakangenga ine aganangaha. Ia koborrangko social media gita man∙soaha, indiba iani bidingo name dake talkujaenga aro am∙sandianirangko dakengon songdongenggipa pilak manderangko ku∙cholsan ong∙e kamko ka∙na gitaba DGP didiangaha.
