Da·al salo West Garo Hills Tura-ni DRDA conference Hall o salsana Sevottam-ni bidingo training programme ko ong·atanga. Ia programme ko West Garo Hills, South West Garo Hills aro South Garo Hills a·jarangni official rangna ong·atangaha jeon West Garo Hills-ni Deputy Commissioner, Jagdish Chelani ba dongpae bakko ra·angaha.
Sevottam ara a·songni manderangna kam ka·e on·anio aro dangdike on·anio namdaptna a·bachengatgipa ong·a ine Additional Deputy Commissioner Winje R G. Momin u·iatangaha. Meghalaya Right to Public Services Act 2020 o pangchake dingtang dingtang kamrangko somoigita manderangna ra·bae on·a, songdongenggipa manderangna kraa gita kamrangko ra·bae on·a aro office rangni dakna nanggnigipa kamrangko daito o done chu·sokatani ong·a ineba Momin aganangaha.
Ia salsana ong·atgipa training programme ko MATI, Shillong ni dakchakanichi West Garo Hills District Administration chu·sokatna gita man·aha.
