GHADC o kam ka·giparang batanggimin February 26 tarikoni uamangni jingjengataniko on·gimin sal somoirang bon·ahani gimin mijal sal February 28 tariko dontongate da·aloni office-o kam ka·angtaina tik ka·angaha. GHADC o kam ka·giparang ja 32 ni dormarangko on·china da·o chalaienggipa Executive Committee (EC) ni kosako batanggimin salrango uamangni dabienggipako niatchina salsnina somoirangko on·ahaoba EC knachakjani a·selo NGEA ia jingjengataniko dakna ja·ku de·angaha.
EC ni knachakjani bidingo NGEA ni President Brithen M. Sangma suk ong·gijaniko parakange uamangni jingjengataniko da·o dontongatahaoba jinma baksa ku·monge mikkangchi ja·ku de·na chanchirimaniko dakangaha aro EC na March 10 tarikona uamangni dabianiko knachakchina somoiko donangaha ine parakangaha. Ia dongimin somoio EC kanchakjaode March 11 tarikoni a·bachengtaie dontonggija jingjengataniko dakangtaigen ine Sangma u·iatangaha. Garo Hills o pilak songdongenggipa manderangko GHADC o an·tangtangni kam nangarangna re·bae ka·epachinaba Sangma parakangjolaha.
