Bang·gija salrangna skang mingsingbegipa Garo National Liberation Army (GNLA) bobil dolrang tom·taienga ine giproroenggipa koborrang kakket ong·genchimode sorkari nanggipa ja·kurangko de·e kamrangko ka·anggen ine Cabinet Minister Rakkam Sangma aganangaha. Ia chango bobil dake chakatgipa dolrangna tom·taina altugipa ong·jawa aro ia kamrangko dakna skang uamang chang 100 chanchina nangchenggen ine Sangma aganangaha.
Uamangni daka kamrangko batanggimin salrango Garo Hills ni manderang chu·ongagitan chagrongaha aro anga chanchia da·oni somoio ia saknaanirangko chaktaina manderang seng·gipa ong·e uamangna namgipa aganchakaniko on·anggen ine Sangma aganangaha. Skangni salrango bang·a namgijagipa kamrang jekai doka satani, ma·gipako so·otani, manderangko goe galangani aro nokrangko nosto ka·anirangko nikaha jean da·o bilsi 10 ni ja·man Garo Hills salgigita chacha ong·pilaha ine Sangma aganangaha. Bobil dolrangna ia chango tom·tainagita neng·begipa ong·an baksana uamang drae re·mikkangode kamni kri sastiko chakna nanggen ine Sangma aganangaha.
Ia koborrang bebegipa ong·ode pilakna skang uamangni dabianikoba knachengna nanggen jeon dabianirang kakketgipa ong·ode agangolpogrike sorkari am·sandie ja·kurangko deanggen ine Sangma u·iatangaha. Indake ong·genchimoba janggi tanganio tom·tomgipa ramako baseanin gamchatbegipa ong·a ine Sangma agandapangaha.
