East Garo Hills, Williamnagar bus station ni sepang jolo donggipa gitchambegipa dolongko dal·dape tarie on·china A·chik Progressive Approach (APA) dolrang a·jako nirokenggipa aro dilenggiparangko didiangaha. Ia rama Williamnagar DC office ona dakanggipa ong·a jekon manderang salantio re·ruraanio chonbegipa dolong ong·ani gimin chang·sano gari bolsasan batsotna nange gipin garirangde senge dongna nangao ga·akenga ine APA dolrang u·iatangaha. Ia gitchambegipa dolong 19th century chasongrangonin ong·naba gnang jekon bang·a MLA, MDC, District Administration, Officerrang, Chief Minister aro MP rang batsotmanahaoba tarie on·ade nikguale dongenga ine APA dolrang aganangaha.
Dolong an·tangan ku·sik agana man·gipa ong·genchimode gital tarie on·china ku·rang on·manenggenokchim ine APA aganangaha. Songjinma jangchio ia namgijagipa dolongni donganiko nike pilak dilgiparang rasong chaama ine APA dolrang sing·doangaha. Unbaksana anti damo be·en den·e palgiparang aro gipin dokan dakgiparangni jabolrangko skatang galanichiba sengbegipa bibarang ong·katenga jekon officerrang an·tangtangba ia ramako salantian re·pakenga ine APA ni President Francis Ch. Marak parakataha.
Dilgiparangni simsakgijani a·selo ia cha·song gitchamni dolong da·onaba re·ruraengiparangna neng·nikaniko on·engkua aro mikkangchi Williamnagar songjinmani gipin ramarangko tarina skang ia dolongko dal·dape tarie on·chengna nanga ine APA dolrang aganangaha.
