Bon·kamgipa budget session-ni salo tangka paisarangko chamna miksongani bidingo Chief Minister Conrad Sangmani aganchakna skangan grant rangko February 23 o ra·chakaha ine Speaker ni agananina Assembly ni dongimin niamko pe·ani ong·a ine opposition dolni memberrang Assembly hall oni ong·kate kataha. Ia niam pe·ani bidingo Congress ni member Celestine Lyngdoh sing·donagita a·bachengaha jeon bangki memberrangba uni agananina chakangpaaha.
Ia obosta ong·aniara Assembly ko dilengon, memberrang somoiko indin re·atenga ine Speaker Thomas Sangma an·tangni agangipa kattako proceeding oniko ra·galjanina niamko pe·ani ong·a ine Dr. Celestine Lyngdoh suk ong·gijaniko aganangaha. Unbaksana February 23 tariko grant rangko ra·chakaha ine Chief Ministerni agananina, ian dongimin niamrangko pe·ani ong·a ineba Lyngdoh jegalangaha. Indake BAC ni tom·anio opposition dolrangba bak ong·e dongpana nanga ine sorkari agangenchimoba pilak opposition memberrang Assembly House oni rang·san ong·katangskaaha.
Dr. Mukul Sangma aro gipin memberrangko kobor ra·timgiparangni sing·aniko dakon, grant rangna nangdapgipa dabianirangko niamogitade Chief Minister ni aganchakani ja·manosa ra·chakna man·a aro indake ia grant ko February 23 tariko ra·chakaniko jegala gnang niamko pe·ani ong·a ine opposition dolni member rang aganangaha.
