Chief Minister Conrad Sangma, re·baenggipa bilsi bongani gisepo lakh 5.5 kamrangko bikote on·a miksonganiko da·al salni budget session-o parakangaha. Batanggimin bilsigittamni ning·ao da·o dipet lakh 2.34 mang kamrangko a·dokni manderangna on·a man·ahanikoba Sangma janape aganangaha.
Batanggimin bilsi gnini gisepo sorkarini kamrangna Medical Department o ge 500 na bate kamrangko doctorrang mangmangna ra·baaha, nurse rang aro gipin technical staff rangna 300 mang, police na ge 1000 ong·nasipile, skigiparang na 900 batpile kamrangko bikote on·aha ine Sangma parakangaha. Contractual, casual aro district-rangni gadangrango kam tikatako changale ia dal·dalgipa department rango bilsi gittamni gisepo chadamberangna ge hajal 3 mangna kamrangko on·aha ineba Sangma agandapangaha.
A·dok sorkari dingtang dingtang project aro programrang jekai MGNREGS, CM Elevate, MGMP, Skill Meghalaya, PRIME, FOCUS, FOCUS +, Chief Minister Youth Centre, NRLM aro gipin cholrangchi chadamberangna kamrangko bikote on·a sorkari jotton ka·enga ine Sangma parakangaha. Ia kattarangko Sangma, Nongstoin ni MLA Gabriel Wahlang ni sing·anina aganchakangaha.
Bilsi gnini gisepo District selection Committee (DSC) o kamrangna dorgastoko da·onaba ra·chakkujaengani gimin basako ia bangbanggipa kamrango gapatna DSC ra·chakanggen ine Wahlangni sing·dapanirangna, batanggimin salrango Covid sabisi aro court o roster systemni bidingo jajaanirang ong·katani a·selo nangagita kamrangko bikote on·a man·jaoba bang·bata a·jarangon ge·sa ba ge·gni a·jarangko watchange kamrangko bikotanide donga ine Sangma aganchakangaha. Ia jajaanirangko matchotani ja·mano DSC ni kamrango rimnapna ta·rakbatatgen ine Sangma ka·dongani kattarangkoba aganangaha.
