East Garo Hills ni A·chik Progressive Approach (APA) dolrang GHADC o kam ka·giparangna ja 32 ni dormaharangko on·kujanina uamangni suk ong·gijako parakataha. GHADC o kam ka·giparang an·tangtangni man·gni dormaharangko bilsi gittam ong·nasipiloba man·kujaengani a·selo salantio nangarangna koros ka·na neng·nikanirangko man·enga ine janapataha.
Jensalo office o kam ka·giparangko rakkiengon uamangni man·gnirangkoba apsandaken on·agita nanga jeon GHADC o kam ka·giparangna ja 32 ong·piloba dormaharangko on·gija donskaenga. GHADC o kam ka·giparang dormaharangko man·jaengani a·selo nokdangko chalaina uamangni nanganirangko ra·na, bisarangko poraiatna, sanna bannaniko dakna, cha·anirangko ra·na, nangarangna songrena aro dingtang dingtang bosturangko ra·na tangka paisa nanganirang dongoba tangka paisani bidingo neng·nikaniko man·enganina APA dolrang suk ong·gijaniko parakataha.
NGEA rangni neng·nikaniko niate apsandaken GHADC ni EC aro MDC rangba okgimu chakna nanggenchimode aro dedrangko skul, collegerango poraiatna man·jaode baditan duk ong·aniko ra·bagen, iako ma·sichake nirokatchina APA dolrang GHADC ko dilenggiparangko mol·molangaha.
Kamo rimnapako man·e dangdike on·enggiparang an·tangtangni man·gni dormaharangko man·jagenchimode Supreme Court of India ni Article 21 of Indian constitution aro Article 300A niamo pangchake ku·rang on·agita man·aniko janapan baksana dormahako on·gijaniara dongimin niamrangko pe·ani ong·a ineba aganangaha. Unbaksana GHADC, bil gnanggipa Committee ni Chairman Rakesh Newar Sangma ni CEM ni office ning·o NGEA dolrangko kragijagipa kattarangchi saie agananikoba A·Chik Progressive Approach (APA) ni President Francis Ch. Marak jegalaniko dakangjolaha.
