Gnigipa budget session-ni salo Mawkyrwat ni MLA Renikton L Thongkar, job reservation-ni bidingo jat gegittamko nangrimate 80% dakatna nanga ine ku·pattigipa kattarangna A·chik State People’s Front (ASPF) dolrang ra·chakna man·jae jegalataha. Indakgipa ku·pattianiko saksa ma·sigipa dilgipani on·aniara uamangni nikanio pangchakani grigipa aro sing·dona nanggipa ong·a ine ASPF dolrang parakataha.
Meghalaya a·dokko 1972 bilsio man·chengaonin skanggipa assembly session-o Turako gnigipa capital ba winter capital dakna ra·chakmanaha aro job reservation ni bidingoba Garo rangna 40% ko on·agita Hills State Movement ni dilgiparang tik ka·angmanaha. Indake ong·genchimoba ia tik ka·aniara pilakan lekkaosan ong·aia, kakketko niatgenchimode da·onaba iako ja·rike jakkalkujaenga ine ASPF dolrang aganangaha.
Job reservation-ni miksonganiara a·doko bang·a gadangrango ja·machakbatgipa aro gipin jatni manderang baksa susana chol ong·pagijagipa jatrangna dingtangmancha dongimin niam ong·a. Kakketko niatgenchimode Khasi-Jaintia jong a·darangna bate Garo jat bang·bata a·baon ja·manchake cholrangko man·rongja aro iarangara itihason donga ine ASPF janapataha.
Meghalaya a∙dokni bilsi 50 gapani ja∙manoba ia niamko maming neng·nika gri ra·chakaniara sea jotaosa dongengkua jean kamchide ong·ja ine ASPF dol parakanga. Da·ona kingkingba Garo rangna a·kange dongiminrangko gapatna nangengkua aro ia bilsi 50 ni gisepo Garo rang man·a nanggniko gimaataha jekon kakket bichalona ra·baaniko sengengkua ine janapangaha. Indakgipa somoio saksa dilgipani 80% ko jat ge∙gittamna bak dakna agananiara maming namgniko ra·bajawa batesa ding·chaoaniko ra·bagen ine ASPF dol parakataha.
Jatprakna tikatgimin reservation policy ko da·o nangatna nangjaha, jekon dingtangatgenchimode da·o jat ge∙gittamni man·enggipa namgnirangkoba gimaataona sokatgen ine ASPF dol aganangaha. Unbaksana jat geantiko apsan gadangona ra·dona man·agita gimikkon nigrike cholrangko on·a nanga ineba aganangaha.
