East Garo Hills a·jao Williamnagar District Basketball Association (WDBA), chadamberangna Basketball kal·aniko skie ra·na sikgiparangna aro kal·na namnikgiparangna coaching camp ko mijaloni a·bachengate skie on·angenga. Ia WDBA ni coaching camp ko Shillong Labet Basketball Club baksa nangrime ong·atangenga jeon National Basketball Association (NBA) Junior ni saksa changgipa sapgipa skigipa Prem Kiddo sokbae skie on·angenga. Ia coaching camp ko WDBA sal 5 na ong·atangenga jeon Prem Kiddo basketball ni basics ba kal·anio mongsonggipa u·ina nangchongmotgiparangko skie on·anggen.
Ia camp o skie ra·enggiparang EGH a·jani adita skul aro collegerangni chatro chatrirangsan ong·aigija gipin a·jarangoniba skiako knae ma·sie ra·nagita bang·a chadamberang re·bae skie ra·aniko dakangenga. Coaching camp ni bidingo WDBA ni dilgiparang aganengon, ian Garo Hills ona indake changgipa sapgipa skigiparangko skanggipa changna okamate chadamberangna skie ra·nagita namgipa cholko on·ani ong·a ine aganangaha. Basketball kal·ani bidingo chadamberang skie ra·engon, mikkangchi WDBA East Garo Hills oni bang·a changgipa susagiparang ong·katnagita ka∙dongsoani kattarangkoba Ku·rongdik kobor ra·timgipana parakangaha.
