Chief Minister Conrad Sangma, da·al salni budget session o GHADC ni kam a·selrangko nirokna council o seoka man·giparang bil gnanggiparang ong·a aro dormaharangko on·anioba council-ko dilenggiparangni jakon ong·a ine aganangaha. Indake ong·genchimoba ia ong·enggipa a·selrangko chagronganiara ong·na kragijagipa ong·a jekon a·dok sorkari council baksa bakrime nambata ja·kurangko de·e uamangna dakchakaniko on·anggen ine Sangma aganangaha.
GHADC o sak 1,577 kam ka·giparang donga jeon council-o jarikit man·enggipa tangkarangko niatgenchimode uamangna dormaha on·a nanganirangara namen bata ine Sangma u·iatangaha. GHADC o jarikit man·enggipa kajinarangara gong crore 1.5 ba crore 2 mang ong·gen aro dormaharangna jarikit jakkalna nanggipa tangkarangara crore 5 mangna gadapangenga ine Sangma aganangaha. GHADC aro JHADC o dormaha man·gijani bidingo a·dok sorkariko matnanganiara kraa ong·ja maina ian councilni jakosa ga·aka ine Sangma aganangaha. Iarang pilakon nigrike korosrangko komiate kim·kimgipa ja·kurangko de·e councilko chalaianio namadapatna nangchongmotgen ine Sangma agandapangaha.
A·bachengao, Deputy Chief Minister, District Council Affairs (DCA) ko nirokenggipa Prestone Tynsong, GHADC aro JHADC o da·o tangka paisanigita neng·nikaniko chagrongenggipako namdapatna sorkari tarisamsoaha ine aganangskaaha.
