Chief Minister Conrad Sangma da·al salni budget session o, 2024-25 bilsirangna gong 2,029 crore tangka paisarangko chamsoani bidingo u·iatangaha jean a·dokni kajina man·aoni 3.83 percent mangnigita ong·a ine aganangaha. Chu·gimik koros gong 27,072 crore chamsoaoniko gong 23,525 crore rangko kajinanigita man·pilna ka·dongsoenga aro dingtang dingtang a·damrangoniko gong 3,527 crore tangka paisarangko ra·sroaniko dakange srogipa tangkako changija chu·gimik koros 23,545 crore ong·gen ine parakangaha.
Unbaksana korosrangchiko niatgenchimode, gong 27,072 crore koros ong·aoniko salantio koros ka·e kamko ka·anio man·pilskaanirangara gong 19,653 crore ko man·a ka·dongsoenga aro tangkarangko ra·soe jakkalanirang gong 7,429 crore ong·gen jeon loan rangko changija gong 1,498 crore ong·gen aro chu·gimik korosrang 25,574 crore nigita ong·gen ine aganangaha. Ra·srogipana on·dapna nanggipa tangkarangara gong 1,236 crore nigita ong·gen aro pension rangna gamna nanggipa tangkarangara gong 1,865 crore mangnigita ong·gen ine aganangaha.
Ia chu·gimik chamsoanirangko sakantian gisik ra·chinagita ‘Mission 10’ ine CM bimung donangaha jeon ming chikkung kamrango pangchake 10 billion US dollar na miksonge kamko ka·anggen ine aganangaha. Ia ming chikkung kamrangko chu·sokatna ku·chakanirangara neng·nikani gri re·a doani, nokantiona ringani chi, ta·rakgipa internet connection, man·a kragipa manderangna nok jamrang, name bijoliko sokatna, komigipa damo aro namgipa sanna bannaniko on·a, nambata gadango poraia skianiko on·a, nanga kamrangna nengrae dakchakna aro neng·nikanirangko nirokatna, nirok simsakaniko dake songsalko aro a·dokni namgnina bakrime kamko ka·angnagita aganangaha.
