Meghalayani me·asa cricket kal·gipa dolrang Ranji Trophy Plate group ni final ko Hyderabad dol baksa da·al salo Rajiv Gandhi International stadium o bon·kame kal·e sirikaha. Skanggipa innings o Meghalaya dolrang 304 runrangko tarinagita man∙angaha jekon Hyderabad dolrang nambee kal·anichi 350 runrangko doke 46 runrangchi skangsonagita man∙aha. Gnigipa innings o Meghalaya dolrang 243 runrangko tariskana man∙e chu∙gimik 198 run ko Hyderabad dolna nisan tariangaha.
Mijal salni bako Hyderabad dolrang 71 runrangko wicket 1 ko ga∙akanio tarina man∙e da·al pringo 127 runrangkosan nange Hyderabad dolrang dokna a·bachengaha jeon uamang sak 4 wicketrangko ga·akdapate bon·kamao Chandan Sahani nitobee 6 sate on∙achi dolko cheataha.
Meghalaya dolni robol gogiparang nambee dakna jotton ka·beahaoba Indian Premier League (IPL) o kal·gipa Tilak Varma ni 64 runrangko 50 ball o dokanichi Hyderabad dolko cheaniona dilanganiko champengna man·jaha. Varma ni wicketko Raj Biswa (1/49) ra·aha, jeon chu·sokbatgipa gogiparangoni Chekam Sangma (3/47) ong·aha aro Aryan Borah saksa wicketko an·tangna segate ra·angaha.
Final ona sokdoe Meghalaya dol da·o Ranji Trophy Elite group na seokako man·aha aro ia chu·sokanina Meghalaya Cricket Association (MCA) ni Honorary Secretary Gideon Kharkongor, ian BCCI baksa 2018 bilsioni bakrimbaa intal nambate dakgipa ong·enga ine aganangaha.
