Col CK Nayudu Trophy na cricket final kal·susaanio, Nagaland dolrang Meghalaya dolko wicket 7 chi amataha. Skanggipa innings o Meghalaya dolrang dokchenge 108 run rangko tarinagita man·aha jeon Nagaland dol chu·gimik wicket ko ga·akate 109 run ko tariangskaaha.
Gnigipa innings ko kal·anio Meghalaya dolrang rasonggribee 53 run mangmangkosan tarinagita man·angaha aro Nagaland nengrabee riknagita man·e wicket 7 chi amchepataha.
Kal·a gimiko Nagaland ni Mughavi Sumi dokgiparangoni nambatsranggipa ong·aha jean an·tangni wicket ko ga·akatgija 62 run rangko doltangna tarie on·angaha. Robol goanio Neizekho wicket 6 rangko ra·na man·angaha aro Hem wicket 4 ko ra·angskaaha jean Meghalaya dolni dokgiparangna namen neng·nikaniko ra·baaha.
Meghalaya dolna dokgiparangoni Mrityunjay Bharali aro Bipin mangmangsan nambatsranggiparang ong·e, sakprak run 11 rangko doknagita man·angaha. Robol goanio Manish Sharma wicket 5 ko ra·angaha aro Bipin Kumar Ray wicket 2 ko ra·nagita man·angskaaha. Meghalaya dolrang final o chenagita man·jagenchimoba batanggimin chang 6 kal·susaanio changsaba sirikgija finalona sokdonagita man·aha.
Ia kal·anio Meghalaya Cricket Association ni President Nababrata Bhattacharjee dongpae Nagaland dolrangna BCCI Championship Trophy ko on·e uamangni cheanina uni nambegipa skaniko on·angaha. Ia kal·susaaniko chu·sokatna man·anian North East Cricket Development Committee (NECDC) na katchabeani ong·a ineba Bhattacharjee aganangaha.
NECDC, North East ni ge 6 a·dokrangni nangrimgipa dol ong·a jeon Arunachal Pradesh, Manipur, Meghalaya, Mizoram, Nagaland aro Sikkim bak ra·e BCCI baksa member ong·e cricket kal·aniko nambata gadangona sokatna kamrangko ka·angenga.
