Da·al sal February 17 tariko Tura Dakopgre SMELC o, Nokma aro gipin songko nokko dilenggiparangna “Legal Awareness on Woman & Child Rights & Child Labour” programko ong·atangaha. Ia programko ma·mong sorkarni Department of Personnel & Training (DoPT) ni dakchakanichi WGH District Administration, Tura aro Meghalaya Administrative Training Institute (MATI), Shillong bakrime ong·atangaha.
Tom·anio aganangengon Council of Nokmas ni President Skylance G. Momin me·chikrangni Legal Rights aro Child Right ni gamchataniko talatangaha. Nokmarangni ia niamrangko ma·sina nangchongmota ine aganangan baksana an·tangtangnasan ma·sie donaigija manderangkoba mikrakatchina ua didiataniko on∙angaha. Unbaksana ua ma·gipachiko chatchi de·e dakbewalaniko, chasongni chasongna ong·baengani aro ma·nokko man·rikani bidingo aganangaha jeon ua me·chikrangni gamchatanikoba talatangjolaha. Tom·aniko dakdilenggiparangoni Good Governance Cell, MATI Shillong oni Asst. Director Ivyreen Warjri “Gender as a Social Construct & Inclusive Public Governance” ni bidingo aganangaha.
Bi·sarangko chonbeaoni kam ka·atani, bading chiwalatani, kragija dake kal·ake roani, dingtang dingtang a·selrang aro uarangko champengan baksana namgipa cholrangko ra·baani bidingo Tura ni District Child Protection Officer, Dency Marak talate on·angaha. Chief Legal Aid Defence Council, DLSA, Rania K. Marak, Nokma Council ni General Secretary, Daniel Ingty aro Executive Member Council of Nokmas Nogorparani Nokma Danny Marak, iamangba me∙chikrang aro bi∙sarangko kragijagipa kamrangoni maikai naljokatna man∙ani bidingo ia tom·anio aganangaha.
