Meghalaya a·doko dingtang dingtang sorkarini departmentrango politics nigita sak 120 mang manderangko Chairman, Co-Chairman, Vice-Chairman, Deputy Chairman, Executive Member, Member Secretary, Member ba dingtang dingtang gadangrango kamko on·e rakkienganiko RTI ka·anio ma·sinagita man·e uamangko ra·galchina Meghalaya State Human Rights and Anti-Corruption Youth Power of India ni Working President Kingstone Bolwari Marak a·dokni Governor na chitti see didiataha.
Ia politics nigita rimnapgimin manderangna A+ ba Cabinet Minister rangni gadangogita, A jean MLA rangni gadanggita, B, C aro D jemangan Gazetted Officer rang baksa apsangipa gadangko sorkarinigita on·enga ine Marak janapangaha. Ua manderangna dal·dalgipa kamrangko ka·anina uamangna jakkalna on·gimin gari gorarangna to koros, sanna bannanirang, re·na dona koros, nok para, indin bijoliko jakkalna aro dingtang dingtang nanganirangko sorkarinigita dongimin tangka paisarangko dormaha dake on·enga ine Marak janapangaha.
Indake politics nigita kamo rakkianiko man·giparangna tangka paisarangko chamna maming niamrang dongja aro indakgipa kamko ka·aniara Constitution ni aro State and Central Service rule rango dongimin article 14, 16, 311 ba adita niamrangko pe·ani ong·a jekon mikkangchi indake politics nigita kamo rakkianiko dontongatna aro je seokako man·giminrangko niamo pangchake ra·galna nanga ine Marak didiataha. Ia politics nigita seokanio service rule ba dingtang niamrangko ja·rikgija, u·iataniko dakgija, porikka seatgija, interview ko ra·gija aro mongsongbate kamko ka·na mai gadango poraigiparangko nanganirangkoba u·iate janapa gri kamo rakkiaha ine Marak janapangaha. Indake politics nigita seokani a·selo manderangni tangka paisarangko jakkalsretaona sokenga jeon mitam manderang saksaan minggni kamo biming donge dormahako changgni dake man·enga ineba Marak u·iatangaha.
Ia politics nigita seokako man·gipa manderangara kosako janapgimin kamrango ka·na kragiparang ong·ja maina uamangara election o sirikgipa ba manderangni jegala man·giparangsa ong·a aro indakgiparangko seokaniara article 14 ni niamko pe·ani ong·a ine Marak janapataha. Je manderangan da·o Chairman, Co-Chairman, Advisor ba dingtang dingtang gadangrango ka·enggiparang poraia skianio chu·onggija jako ra·e kam ka·enga jeon uamangna bate dal∙dalgipa gadangrango poraie chu·sokgipa bang·a chadamberangan hajalni hajal kamgri dongenga ine Marak aganaha.
Indake chugipa gadangrango poraie ma·sigija manderangko kamrangna rakkianiara a·dokni silroro namroronio maming namgniko aro tang·doaniko ra·baani dongjawa, batesa manderangni tangka paisarangko jakkalsretani batroroaniko champengna ua manderangko ra·galna nanga ine Marak didiataha. Indakgipa manderangko seokana batede ia gadangrango ka·na kragipa manderang jemaangan saksa a·dokna dangdike on·e namgniko ra·banagita man·giparang jekai Retd. Officers, MPSC ni Chairman, Member of Consumer Forum, Chief Information Officer, RTI ni Chairman ba Lokayuktani Chairperson rangkosa seoknagita nanga ineba Marak chittio janape didiataha.
