Garo Hills ni adita biaprango koelarangko niamgri watenganina DMR aro Transport officialrangni kosako niamrango pangchake kraa sastiko on·a ja·ku de·china saksa social activist Tennydard M Marak mijal salni bako didiataha. Indake niamgri koela rangko cho·e watenganiko maming nirikkianiko dakgija donganiara a·dokna namen gimaani ong·a jekon Meghalaya sorkari, Meghalaya Court aro sakantian ma·sieba maming ja·ku de·anirangko dakjaenga ineba Marak janapangaha.
Ia niamgri koelarangko watanio jako donge DMR officialrang aro Transport officialrang an·tangtangni ka·na nanggni kamko tik ong·e ka·gija aro niroksimsakjaenganina uamangni kosako mokordoma ka·na nanga aro Enquiry Department am·sandianirangko dake dongimin niamrangni sectiono pangchake nirokatchina didiataha.
Unbaksana Supreme Court aro NGT ni niamrango pangchake koela cho·aniko dontongatani somoio Retd. Justice BP Katakey ni u·iatanigitade chu·gimik Lakh 32 metric tonne rang gnang ine ma·sinagita man·angaha. Sorkarini da∙o Lakh 14 metric tonne rangkosan janapenganigitade Lakh 18 metric tonne rangko niamgri aro challan gri watmanaha ine namen ma·sinagita man·aha ine Marak janapataha.
Indake challan gri tangkarangko ra·e koelako watsrukenganina iani bidingo Athiabari/Porlakait Pulis Outpost o January 30 tariko Marak mokordomako ka·angan baksana nanggipa ja·kurangko de·na Riangdo Pulis Station onaba uni mokordoma ka·aniko watatchina didiangaha ine janapangaha. Niamgri kamrangko ka·aniko ma·sigenchimoba ja·ku de·e nirokatjaengani a·selo re·anggipa Feb 12 tariko Athiabari outpost oni km 1 mang chel·ao koela gape salangenggipa truck ge·sani a·sel ong·anikoba niknagita man·angaha ine Marak janapataha.
