Re·baenggipa Lok Sabha pu·onanio manderang dingtanganiko nikna sikgenchimode Bharatiya Janata Party (BJP) na maming dakeba pu·onjawa ine Tura Parliamentary seat na seokako man·gipa Congress ni dilgipa aro Gambegre ni MLA Saleng A. Sangma kobor ra·timgiparangna parakataha.
Assam A·doko BJP dolrangni gilja nokrangko nisie galanirangko dake neng·nikanirangko on·enganiko nikemangba BJP dolna pu·ongenchimode ian manderang an·tangtangna so·sojengjeng ong·aniko ra·baanisan ong·aigen ine Sangma aganangaha. BJP na chakpagiparang maini gimin BJP ni sorkari rikaoniko ra·galnagita kena ineba ua sing·doangaha. An·ching Meghalaya a·doko BJP MLA sakgnisan ong·genchimoba, NPP jean sorkariko rikenggipa BJP baksa ong·na nangao ga·aka maina ian uamangni Citizenship Amendment Act (CAA) na chakpaani giminsa ong·enga ineba agandapangaha.
Anga manderangna aro Garo Hills na Congress dolnigita chakatengon anga darang party koba matnange aganjaenga aro Garo Hills ni manderangnasa susanagita am·enga ine Sangma aganaha. TMC ba NPP ba je party oniba ong·china gimikan manderangni namnike seokaosa pangchakgen ine Sangma aganangaha. Unbaksana NPP ni Congress party cholijaengaha ine agananina, ian dolo pangchakja indiba manderangni namgipa dilgipako seokaosa pangchaka ine Sangma aganangaha. Uasan ong·aigija election na skang ua maming ku·rachakanirangko daknagita da·o dipet nangnikjaenga ineba agandapangaha.
