SWGH a·jani Ampati Chengkomparao, Meghalaya State Price Monitoring and Resource Unit (MSPMRU) aro National Pharmaceutical Pricing Authority (NPPA) baksa nangrime Medicinal Price Regulation ba samrangko palna dam dakani bidingo “Pharma Sahi Dam” seminar ko ko da·al salni bako a·bachengatangaha.
Ia tom·aniona SWGH ni ADC Y W. Momin mongsonggipa sokgipa ong·e rimchaksoaniko dakangaha. Unbaksana SWGH ni Superintendent Dr. D Momin, Sub-divisional Medical Officer Dr. Suparna Hajong, Tura Civil Hospitalni Grade I Senior Specialist Dr. John R R. Marak, SWGH ni SDSEO E Marak, Assistant Drugs Controller ni ITD Toi, MSPMRU ni Member Secretary, SWGH ni Inspector of Drugs aro dingtang dingtang Pharmacy-o ka·giparang bakko ra·angtokaha.
NPPA, Department of Pharmaceuticals, Ministry of Chemicals and Fertilizers-nigita samrangko komibegipa damrango palna man·agita 1997 bilsini August 29 tariko a·bachengatgipa ong·a. Central Sector Scheme ni dongimin biming Consumer Awareness, Publicity and Price Monitoring (CAPPM) o pangchake PMRU rangko ge 25 a·dokrang ba Union Territory rango ra·gatangaha.
MSPMRU February 2023 bilsio a·bachengaha jean samni damrangko nirokenga, nangchongmotgipa samrangko man·aniko ma·siatenga, jakkalenggiparangna mikrakataniko on·enga, NPPA aro a·doko samrangko nirokenggiparangko dilenga. Ia project samrangni kraagita damrangni tang·doaniko aro komiani bidingo u·iatenga, chasongni chasongna samrangni nambaaniko tang·doatenga, samrangko breanio mikrakatenga, ra·bewalgipa samrangko ma·siatenga, damko krae palaniko nirikienga, NPPA ni kam ka·anirangko, niamni a·palo dakenggiparangko aro sam on·enggiparangni kragija dakaniko nirokbaenggipa ong·a.
National List of Essential Medicines (NLEM) ni parakatanio samrangko aro sanna bannani kolrangko NPPA ni tik ka·anio pangchake 10% bariate segatkugijagipa samrangko palna tik ka·angaha ine u·iatangaha. NLEM ni parakatgipako batanggimin 2015 bilsio u·itaha jekon bilsi 3 prako nipiltaina tik ka·manaha aro covid-19 ni a·selo ra·doatna mol·molaniko dakangmanaha.
