Da·al salni bako New Tura, Matchakolgre L.P Skulni kal·chakram biapo, Turani District Commerce & Industrial Centre nigita sal gittamna ong·angnasienggipa Annual District Level Industrial Exhibition, Tura Industrial Fair 3.0 ko WGH a·jani DC Jagdish Chelani mongsonggipa sokgipa ong·e oprake on·angaha. Unbaksana Tura DCIC ni Functional Manager S.S T. Sangma, F. A. Sangma aro Tura DCIC ni General Manager D. F. R. Marak ba re·bae bakko ra·angaha.
Ia exibition ko oprake on·ani somoio, DCIC dolrangni rakbee kamrangko ka·anina uni namgipa skaniko aro mittelpilskaaniko DC aganangan baksana WGH a·jao 2,300 rangnigita PM Vishwakarma scheme na seokako man·ani bidingoba parakangaha. A·doknigita 3300 na baten PM Vishwakarma ona dorgastorangko sokatnagita chu·sokaniara DCIC dolrangni on·kange aro bimchipe kamrangko ka·ani giminsa ong·aha ine ua aganangaha. Iasan ong·aigija dingtang dingtang a·jarangni karkanarangko bariatna man·agita ia namgipa cholrangko jakkalna entrepreneur rangkoba didiangaha. Ia karkanarangko ripinge game cha·giparangkosan mongsonggipa ong·ate bading chiwalaniko tang·doatanisan ong·aigija uamangni bading chiwalaniko apalbatatna ba bariatnagitaba man·anggen ineba ua aganangaha.
Ia oprakani somoio adita dingtang dingtang a·jani ning·o songadam nokadamrangoni bading chiwale cha·giparang aro sorkarini department office nigitaba pala sim·anirangko dake bakko ra·angenga. Ia Tura Industrial Fair 3.0 o chu·gimik ge 55 dokanrangko dakenggipa manderang bakko ra·angtokenga. Unbaksana ia Industrial Fair o Valentine’s Day theme ko ra·e ma·manti photo ka·chakram biaprangkoba tariaha aro bi·sarangna kalgrike rochaknagita biaprangkoba tarie on·aha. Ia Industrial Fair da·al saloni a·bachenge February 15 tariko matchotanggen.
