Re∙anggipa February 11 tariko Bidang MMA and Fitness Gym ni Guwahati songjinmao Club War 25 Kickboxing/MMA Championship 2024 ko ong∙atgipao Williamnagar-ni bilsi 23 ong·gipa chadambe Chemingberth R. Sangma bakko ra·e chu∙sokgipa ong∙baaha. Ia susagrikanio Chemingberth uni weight division-o gipinrang baksa susaange Gold medal ko man∙baaha.
Chemingberth, boxing kal∙aniko 2018 bilsirangoni Williamnagar songjinmao ranta ka·na a·bachengaha jeon ua poraidapna nangani gimin gipin biapchi ong∙katna nange dontongna nangao ga∙akaha. Ian uni skanggipa combat sports ba su·grikanio bak ra∙ani ong∙genchimoba ua chu∙soknagita man∙aha. Ia MMA kal∙ani a∙bao ua re∙anggipa bilsi 2023 onisa skie ra∙e kal∙nagita a∙bachengaha ine u∙ina man∙aha. Ku∙rongdik baksa adita golporimanirangko dakanio, ua Beast Hub MMA Gym ni nokgipa jean National Muay Thai Gold medalist 2018 ko man∙bagipa aro dingtang dingtang susaanio bang∙a medalrangko chebagipa Khalidur Rahman-o dingtangmancha skie ra∙aniko dakangaha ine parakataha.
Chemingberth R. Sangma East Garo Hills a∙jani Williamnagar Rongbing Boldak-oni Hellickson R. Marak ni depante ong∙a. Ua da∙o Master of Commerce (M.Com) ko Assam Don Bosco University-o final year ba 4 gipa semester-o poraianiko dakangenga.
Garo Hills-o indakgipa Combat sports-rangna gisik nanggipa bang∙bea aro songadamni chadamberang bilnigitaba namen rakbegipa ong∙e ia kal∙susaanio bak ra∙nagita bilongen sapgipa aro gong·gipa ong∙anggen ine Chemingberth janapangaha. Indake ong∙genchimoba ia sports-ni gimin agantalate didie on∙gipaba dongjani gimin aro skie ra∙ani a∙damrang dongjani a∙sel maming dakeba dakchakniko man∙jaenga ine ua aganangaha. Garo Hills-ni pilak a∙jani skotong songjinmarango MMA gym ba club rangko kulina man∙genchimode, gimik dakgipa combat sports-ko jekai Boxing, Muay Thai, BJJ, Kickboxing, Wrestling aro gipin susaanirangko training ra∙na man∙agita sportsni a∙bao chadamberang namen dakchakaniko man∙anggen ine janapatan baksana ua dingtangmancha iani bidingo mol∙molatanikoba dakangaha.
