Mijal salni bako Tura-ni MDC Bernard N. Marak, Rongara-Siju constituency ni ning·o donggipa chatro chatrirangni neng·nikanirangko chagrongenganina nirokatchina Education Minister Rakkam A. Sangma-ko mol·molataha. Batanggimin antio ua Rongara-Siju constituency ona re·ange nianiko dakon sorkarini chalaienggipa skulrangni nokkingrangni nosto ong·aniko, paikanarangni namgijaniko aro ringani chirangni donggijaniko nikna man·aha ine aganangaha. Uasan ong·aigija skulni do·ga, blackboard aro asongchakgipa chokkirangni donggijaniko nikna man·aha aro mitam skul ni bakrangode do·bokrangan dongchakenga ineba Marak chittio janapatjolaha.
2022 bilsio chi bana ong·e jolni chiringko kabatgipa dolongko mananganichi ua biapo donggipa chatro chatrirang mikka wachini somoio neng·nikanirangko chagrongnagita nangenga. Ia dolongko da·onaba tarie on·pilkujani a·selo poraienggipa chatro chatrirang chiringko jrobate skulona re·angna nangenga aro mikka waani somoiode skul kutina nangaona ga∙akenga. Jolni manderangni duk ong·e parakatanigita indake simsakgija dakanichi chatro chatrirang an·tangtangni janggitangko gimaataona soknaba gnang ine Marak aganangaha.
PM Poshan nigita sualgipa mid-day meal ko on·anioba ua biapo dongenggipa mitam skul rango namgipa gadango ong·jaenga ine Marak aganangaha. Iarang pilakko niate skulrango poraienggipa chatro chatrirangni aro skigiparangni nanganirangko nirokate dormaharangko somoigita on·pachina Marak mol·molataha.
Unbaksana chatro chatrirangni man·a nanggnigipa scholarship-rangkoba sorkari niatkujaengani gimin uamangni neng·nikaniko ta·rakale niatpachina Marak chittio janapataha. Ian kangalbegipa chatro chatrirangna uamangni poraini somoio nanganirangko man·a dakchakaniko on·a ine Marak aganangaha. Bon·kamao Marak ni knaagita skulni gitalgipa ki·taprangko tarinagita ki∙tap tarichakram nok grigipa contractorna pakwataha ineba janapataha. Ia kattarang kakket ong·genchimode iani bidingo talatpachina Marak, Education Minister-ko aganangaha.
