Meghalaya a·doko dingtang dingtang changa sapanio pangchake kam ka·e cha·enggiparangna Prime Meghapreneur Expo 2024 ko salgittamna Shillong songjinmao ong·atanggipa da·alo matchotangaha. Ian bang·a pala sim·aniko dake cha·enggiparangni chu·sokaniko aro tang·doaniko dal·bee maniani ong·a jeon Chief Minister Conrad Sangma, Deputy CM Sniawbhalang Dhar unbaksana a·dokni gipin Ministerrang aro Officerrang dongpae bakko ra·angaha.
Tom·anio Chief Minister aganengon, dingtangmancha bang·a pale sim·e cha·enggiparangna sorkarinigita dakchakaniko CM Elevate program-chi tang·doatna kam ka·anirangko re·baenggipa bilsi 3 ba 4 rango sak hajal 20 manderangna ia programchi dakchakaniko on·a miksongani gnang ine ua aganangaha. Batanggimin salrango sorkarini dakchakanichi sak 71 an·tangtangni changa sapanichi ka·e cha·giparangna chu·gimik gong 22.67 crore tangkarangchi dakchakanikoba ua parakangaha.
Ian uamangni MDA sorkariko a·bachengaoni gital kamko ka·e cha·enggiparangko tang·doate mikkangchi kamrangko bikotna aro a·dokni kajina man·aniko bariatna miksongenggipa ong·a ine Sangma aganangaha. CM Elevate programnigita 75 percent subsidy ko on·e, bading chiwalgiparangna tang·doaniko ra·bae on·anian sorkarini re·mikkangani aro dakchakna miksongani ong·a ine Sangma agandapangaha.
Ia programo dingtang dingtang cholrangchi PRIME aro CM Elevate o name dakgiparangna upadi lekkarangko aro award rangko on·angaha. Unbaksana Chief Minister’s E-Champion Challenge 4.0 aro Prime advanced training centre nigita adita seokgiminrangna cheque aro upadi lekkarangkoba on·angjolaha. Iasan ong·aigija programona sokbagiparang karkanani a·bao u·i ma·sigipa jekai Jayanta Das, Shashank Kumar aro Raghuram Kuchibatla, iamang baksa agangolpogrike ma·sie ra·na cholkoba man·angaha.
