Da·al saloni 11 tarikona sal bri na ong·atanggenggipa Vividhta ka Amrit Mahotsav ko Delhi songjinmani Rashtrapati Bhavan o, a·songni President Droupadi Murmu ni jakchi oprakaniko dakangani programo A·chik jatni Wangala chrokaniko Northeast ni cultural event ko ong·atani somoio bak ong·atanggen ine koborna parakataha. Wangala chrokaniko bak ong·ataniara, Northeast ni a·dokrangni daka rikaniko nambee ripinganiko aro gamchatnikaniko mesokani ong·a. Ia program ko CPSE nigita Union Ministry of Development of Northeastern Region (DoNER), Northeastern Handicrafts & Handlooms Development Corporation Limited (NEHHDC) bakrime ong·atangenga jean Amrit Udyan o Udyan Utsav 2024 ni bakgita Rashtrapati Bhavan ni ning·o ong·angenga.
India a·songo daka rikanirangko nambee ripingangkunagita, a·songni dingtang dingtang bakrangni daka rikanirangna manianiko dakna re·baenggipa bilsirango changgni dake maninagita a·bachengatanggen jeon a·song gimikni Northeast, North, East, West, South, Central aro Union territories rangni daka rikanirangkoba bak ong·atange, Northeast ni ge 8 a·dokrangni dakbewal rikbewalrangko ripinganiko mande ra·anigita skanggipa changna maniangenga.
Vividhta ka Amrit Mahotsav ko a·bachengatani miksonganiara bang·a Northeast ni dingtang dingtang jatrangni dakbewal rikbewal, jakchi tarigimin bosturang aro chasongrikrik ja·rikbaenggipa daka rikanirangko mesoknagita ong·a. Ia manianio mongsongbate jakchi sol·a repani, sika koani bosturang aro game ge·e man·giminrangko wilwilao tang·doatanagita miksongani ong·a. Mahotsav programko ong·atanian Northeast a·dokrangni daka rikanirangko aro dingtang dingtang jatrangni dakmesokani ba chrok mesaanirangko ra·donagita a·bachengatani ong·a.
