West Garo Hills a·jani Raksamgre Sub-Division ni ning·o ga·akgipa bang·a songrango Jal Jeevan Mission (JJM) ni kamrangko name matchotatgija ka·angaha ine Association for Democracy & Empowerment (ADE) dolrang PHE Minister Marcuise N. Marak na chittio see janapataha.
Ia jolrango JJM scheme-ni kamko ka·manahaoba bang·bata song ba gittim antirango name matchote ka·angjaha ine ADE dolrang PHE Minister na u·iataha. JJM ni kamrangko nambate aro matchote ka·e on·pachinagita ADE dolrang Minister-o dingtang mancha sorkarioni jako ra·giparangko watate nirokatpachina mol·molataha.
Unbaksana JJM ni kamrangko matchote ka·manaha ine parakatna skang, tarimangimin songrangona re·ange nirok sandiepachinaba uamang Ministerko didiangjolaha. Raksamgre Sub-Division ni ning·o ga·akgipa songrango JJM ni kamrangko nirokatpagenchimode uamangna chi man·anio namen jakkaltobegipa ong·anggen ine ADE dol janapangaha.
