ABDK ni bilsi 150 gapani jubilee ko bon·kame da·al salni bako Balupara ni Bethel A·bri o manianiko dakangenga. Ia manianiona World Baptist Alliance ni President Dr. Tomás Mackey ba dongpae bakko ra·angaha.
Ia bon·kamgipa salo Isolni namgipa kattarangko Kristoo bebe ra·ani, pap ka·aoni jakgitel ong·ani, kema ka·grikani aro Isolna dangdike on·ani bidingo skiprakangaha. Unbaksana Garo Baptist Convention na gitalgipa General Secretary ni kamko jako ra·e ka·nagitaba Rev. Dilseng M Sangma ko songe donangaha.
Ia an·saobegipa jubilee manianiona Garo Hills ni kona noksik aro Assam a·dokni dingtang dingtang biapni manderang re·bae bakko ra·angtokaha. Una agreba a·dokni Chief Minister Conrad Sangma, Tura ni MP Agatha Sangma, Assembly Speaker Thomas Sangma, Education Minister Rakkam Sangma aro bang·a dilgiparangba ia manianiona sokbatokaha.
