Mijal salni bako Chennai a·doko ong·atenggipa Khelo India Youth Games 2023 o Meghalaya aro Punjab ni gisepgriko robol kal·anio Meghalaya dolrang, Punjab ko goal 2 – 1 chi amataha. Ian group nigita kal·anio gnigipa changna Meghalaya chegipa ong·angtaiaha jeon Badondor Marbaniang aro Mebannangkiew Thabah goal prakko chipnagita man·aha. Skanggipa kal·anio Meghalaya dol Uttar Pradesh baksa kal·e chegipa ong·angaha.
Da·o changsatai group nigita bon·kamgipa kal·aniko Meghalaya dolrang, Tamil Nadu baksa JN Stadium B kal·chakram biapo kal·angskagen. Ia group nigita susaanio Meghalaya, Uttar Pradesh, Punjab aro Tamil Nadu ni giseponi je dolgni an nambate pointrangko man·a, ua dolgnirang semi finalko kal·nagita seokako man·angskagen.
