Mijal salni bako West Jaintia Hills o Wahiajer Multi Sports Complex ko Skotong Minister Conrad Sangma ni jakchi oprake ong·angaha. Ia oprake on∙anini somoio, sorkari a·dokni chadamberangko kal∙∙susaani a∙bao tangdoatana kam kanagita kumitchetaniko dakangaha. Batanggimin bilsi bongao kachakram biaprangko rika choanio bangbate tangka paisarangko koros ka·angaha aro banga namdapanirangko re∙baenggipa bilsirango nikangkuna gita man·gen jekon batanggimin bilsi 45 na kingking maming rika cho·anirangko niknagita man∙jachim ine Sangma aganangaha.
6 gipa Meghalaya games ko WJH a·jao sokachakna gita Sangma parakangaha, jean WJH o songdongenggiparangna namen rasongchabeani aro katchabeani ong∙a maina Meghalaya games a·doko dalbatsranggipa kalsusaani a∙ba ong∙a. Ia games o medalrangko chegiparangko Shillong songjinmaona okamate mitelpilaniko dakanggen una agreba uamangna scholarshiprangko on·anggen aro kalsusaani a·bao changa sapaniko mesokangkuchina gita tangka paisani gitaba dakchakanggen ine Sangma kadonganiko on·angaha.
Iasan onggaigija sorkari chadamberangna an∙tangtangni changa sapanio, kal∙susaani, bading chiwalanio aro doke dame ringsalani a∙bao tang∙doatna miksongan baksana Science, Math aro Innovation ko radona aro scientific temper o chadamberangko kadongatan baksa gital chanchiani ba cholrangko on·na gita susaanirangko ong·atna gita miksongenga ine Sangma aganangaha. Unbaksana Inter constituency Football Tournament susaanirangkoba ong·atnagita miksongenganikoba Sangma janapangaha.
