Da·al pringni 8:30 bajimango GBHSS Football kal·chakram, Chandmari Tura o Reliance Foundation Young Academy aro District Football Association (DFA) nangrime bilsi 11 aro 12 ong·gipa me·a bi·sarangna uamangni football kal·anio changa sapaniko nie baseaniko dakna a·bachengataha.
Bi·sarangko nigrike baseaniko salgnina chong·motan January 22 aro 23 tariko ong·atanggen. Ia kal·chakramona da·al pringo Garo Hills ni adita dingtang dingtang a·jarangoni sak 20 na bate bilsi 11 aro 12 ong·gipa bi·sarang re·bae bakko ra·angtokenga. Apsan daken bilsi 13 aro 14 ong·gipa bi·sarangnaba ia bilsini July jao ong·atna miksongenga ine DFA ni General Secretary, Gamcheng R. Marak koborna parakatangaha. Unbaksana mikkangchi me·chik bi·sarangnaba trial ko ong·atani donggen ine ua agandapangaha.
