Meghalaya Games 2024 o bilsi 18 ni ning·o ong·gipa football kal·anio Ri Bhoi a·jani me·asa aro me·chik dolrang mijal attamni bako PA Sangma sports complex o kal·e gold medalko cheangaha.
Me·asarangoni Ri Bhoi baksa West Jaintia Hills an·saobee kal·anga aro uamangni dakmesokani ia kal·chakramo gisik ra·na krabegipa ong·aha. Dolgnian namgipa cholrangko man·genchimoba chu·gimik somoi matchotaonan goal chipna man·jae somoi ra·dape kal·atgipani bon·angachipak Riskhem Syiem ni goal chipna man·anichi Ri Bhoi-ni me·asa dolrang gold medalko man·angaha. West Jaintia Hills dolrang silver medal aro East Khasi Hills dolrang bronze medalko man·angskaaha.
Apsandake me·chik dolrangoni Ri Bhoi baksa East Khasi Hills ni kal·anio chu·gimik somoio goal chipna man·jae penalty dokgrikna nangaona sokaha. Ri Bhoi ni goalkeeper Nibari Maring uni changa sapanichi goal 2 ko rim·rikna man·e bon·kamao 3-2 chi dolko chena dakchakaha. Maring ia chango Best Goalkeeper of the tournament award koba man·angaha. East Khasi Hills doloni Inrilaidor Khongthaw kal·a gimiko goal 15 ko chipna man·e Top Scorer aro Player of the Tournament Award ko man·angskaaha.
