Meghalaya Games 2024 ni bon∙kamgipa Volleyball kal∙susaaniko da∙al salni bako South West Khasi Hills aro West Garo Hills me∙asa dolrang Matchakolgre L.P skul kal∙chakramo susaangaha. Ia dolrangni kal∙aniko ninagita manderang namen sengsoe dongaha jeon SWKH a∙ja WGH ni kosako a∙jak sotna nangao ga∙akaha aro WGH rang an∙tangtangko changsatai nambatgipa ine mesoke sakkiko on∙a nanggipa ong∙skaaha.
Kal∙a a∙bachengao WGH dolrang set 1 ko chee SWKH dolrangna skangsoe dongsoaha, uni ja·man WGH dolrang set gni dongkuenggipakoba joljol an∙tangtangni changa sapaniko jakkale a∙kange ra∙enba SWKH dolrangni kosako chegipa ong∙na man∙aha.
Indake WGH dolrang Meghalaya Games 2024 ni gold medalko Volleyball kal·susaanio man∙e a∙jatangko tang∙doataha. SWKH dolrang jotton ka∙beoba silver medalkosan man∙a amaiaha aro bronze medalko SWGH dolrangba man∙angskaaha.
Apsandaken me∙chikrangni skanggipa biapna bon∙kame kal∙susaaniko South West Garo Hills aro South West Khasi Hills ni gisepo susaangskaaha. SWKH dolrang kal∙a gimiko chu∙gimik gegittam set o chegipa ong∙e SWGH dolrangko 3-0 chi amataha. Indake SWKH a∙jani Volleyball kal∙gipa me∙chik dolrang Meghalaya Games 2024 o gold medalko man∙e chegipa ong∙angaha. East Khasi Hills dolrang bronze medalko man∙skaaha.
