Meghalaya Games 2024 o football kal∙susaaniko January 11 tariko a∙bachengate da∙o bon∙kamgipa kal∙anirangko January 18 oni 20 tarikona P.A Sangma Sports Complex-o kal∙atskana tik ka∙angenga.
Me∙asa dolrangoni semi-final ko East Khasi Hills baksa Ri-Bhoi susaanggen aro West Jaintia Hills baksa West Garo Hills kal∙susaangskagen. Me∙chikrangni semi-final kal∙aniko Eastern West Khasi Hills dolrang Ri-Bhoi baksa susaanggen, unbaksana minggipin kal∙anio South West Khasi Hills dolrang East Khasi Hills baksa kal∙susaanggen. EKH dolrang me∙chik dolrangoni bilakbate kal∙giparangoni ong∙enga jeon uamangni pilak kal∙giparangoni ge∙sa kal∙anio goal 18 ko chipna man∙angaha.
Semi final susaaniko Bristibar salo kal∙atnagita tik ka∙aha aro final kal∙susaaniko Sonibar salo kal∙atskagen ine parakataha. Ia football kal∙susaaniko bilsi 18 ni ning∙o ong∙giparangsan dingtang dingtang dolrang baksa susagrikenga ine u∙ina man∙aha. Indake ong∙genchimoba me∙asa dolrangoni North Garo Hills susapana man∙jaha unbaksana me∙chik dolrangoni North Garo Hills aro South Garo hills bakko ra∙angjaha. Ia susaanio me∙asa dolrangoni dam 11 a∙jarang bakko ra∙angaha aro me∙chik dolrangoni chu∙gimik dam 10 a∙jarang susagrikangaha.
