Class X gadango poraienggipa chatro chatrirangna free coaching class ba indin skie on·aniko January 15, 2024 tarikoni Selsellani Mahila Mandal Secondary School o pringni 11:30 bajioni a·bachengate skie on·aniko dakanggen ine ASWA aro FKJGP Selsella Unit u·iatangaha.
Indake apsan dakgipa programko batanggimin bilsi gnio chalaie chu·sokgipa ong·an baksana skie ra·gipa chatro chatrirangni namroroaniko niknagita man·angaha ine parakataha. Poraia skiani a·bao poraienggipa bi·sarangko gisiko nangatnagita uamang bimchipe kamko ka·angenga jeon porikkao name chu·soke Top 20 o bimung donggipa chatro chatrirangna Scooty, Laptop ba ge·gnikon indin suale on·angnagita u·iataniko dakangaha.
Chadamberangni poraia skianiko mikkangchi tang·doatnagita indakgipa namgipa cholko ra·e indin skie on·enggipao bakko ra·atna ku·cholsan kamko ka·na FKJGP aro ASWA dolrang ku·monganiko on·atjolangaha.
