Batanggimin salrango gitcham MDC Sofior Rahman ni Central Vigilance Commission na JJM project ni bidingo am·sandianiko dakchina mol·molani chittiko sedoatanina, PHE ni Minister Marcuise Marak JJM ni tangka paisa rangko maming dakeba jakkalstretani dongja aro ia kattarang Lok Sabha election sepangani giminsa matnange politics kal·engasa ine aganchakangskaaha. Minister ni aganchakanina Rahman, uni aganako jechake dam gittam biaprango JJM ni tangka paisarangko jakkalsretani bidingo agantalate on·angskaaha.
Nekikona ni dam 26 songrangna mongsonggipa pipe salgipa aro chiko sokatani da·onaba dongkuja jean December 2021 bilsioni kam ko a·bachengate re·anggipa 2023 ni December 31 tariko matchotatani ong·genchimoba kamrangko ka·gijaan gong crore 51 ko contractor na tangka ko gamanaha ine Rahman jaksi ote aganangaha. Balbigre Water Supply Scheme na chamatgimin gong 38.90 crore oni gong 33 crore ko contractor na gamanaha jeon sorkarini lekkarangode 2,544 oni 1,499 nokdangrangna Functional Household Tap Connection ba chi jokgipa pipe rangko sokataha ine segatskaaha. Balbigre ni dam 17 songrangko niatgenchimode chiko salgipa mongsonggipa pipe ge·sakon teke on·kuja ine Rahman aganangaha. Unbaksana Sakmal Combined Water Supply Scheme nikoba apsan daken gong crore 20.94 chamataoniko gong 15.40 crore ko contractorna on·mangenchimoba nokdang ge·sanamangba chiko sokatkujan baksana songna mongsonggipa chi ni pipe ko teke on·kuja jekon PHE Departmentrang dam 8 songrango 1,055 nokrangna Functional Household Tap Connection ko sokataha ine parakangaha.
Ia dam gittam biaprango JJM ni scheme ko jako ra·enggipara Hyderabad ni BAC Infratech Pvt Ltd ni contractor ong·a ine u·inagita man·aha. Contractor rangna tangka paisarangko gamna skang porikka ra·e nigipa agency rangni ra·chakosa tangka paisarangko gamna man·a ine PHE minister ni agangimin kattarangko Rahman jechakangaha maina agency ko PHE Department sa kamo donani gimin contractor na neng·nika gri tangkarangko on·sona man·aia ine Rahman aganangaha. Una agreba PHE Minister ni agananiko kakketgipa ong·ja ine aganan baksana mikkangchi indakgipa kamrangni bidingo name am·sandianiko dake nirokangchinagitaba Rahman didiangaha.
